因土地問題冇焗爐,但都可以整麵包—上新粉吐司

[ A+ ] /[ A- ]

BreadPic7

好多時候,見到電視上教煮食,「首先」就係要有一個大廚房,因為你要有幾個爐頭,又要有微波爐、焗爐、光波爐等等工具,但係香港哩個「土地問題」嚴重嘅地方,根本係有錢買焗爐、麵包機,但冇錢買樓來擺,睇完果啲離地節目,只可以嘆一口氣。

當然,我唔係金融才俊,所以冇一個大到可以擺曬所有嘢嘅廚房,廚房只有一個爐頭,連微波爐都冇。之但係就要係哩種極端情況下,我依然要「自己麵包自己做」。(當然,世界上仲有N億人冇煤氣供應 ,廢青真唔挨得。)

做之前我先介紹一下咩叫上新粉,其實我都係第一次用,有次睇到超市做特價時買左幾包。翻查資料,上新粉相當於粘米粉,上新粉是日本嘅叫法,是一種日式點心嘅常用材料,所以做出來嘅麵包更Q,有種麵包與鬆糕混合體嘅感覺。

好喇,開始入正題了,先講講有咩必要廚具:

生鐵鍋一個,蒸架一個,吐司麵包模一個,鐵盆一個(大小可以放入鐵鍋中)。

材料:

高筋麵粉330g,上新粉70g,水250ml,鮮奶50ml(或者奶粉10g,水40ml),黃糖20g(白砂糖亦可以,),有鹽牛油30g(或者無鹽牛油25g,鹽5g),酵母粉5g。

BreadPic1

首先,當然係要將材料秤重準備好,其中麵粉、上新粉、糖等粉狀物在秤重完成後就可以倒入鐵盆裡面混合均勻,而牛奶就同牛油放埋一齊,稍微加熱令牛油變為液態即可(溫度差唔多手可以拿到,太熱會殺死啲酵母菌),方便之後混合。

然後就可以係麵粉裡面倒水混合,水唔好一次過全部加入去,我一般分3-4次,每次倒入後,就攪拌一次,等全部水都加入後,哩個時候一堆麵粉應該仲係結成一塊塊,再倒入加熱過嘅牛奶及牛油,開始搓麵團,搓成一個整體就可以,因為用了上新粉,麵團會比做其他麵包嘅麵團要濕,係冇辦法搓到唔粘手,之後就用保鮮紙封口。

BreadPic2

可見上圖連盤放入鐵鍋中,而鐵鍋中本身就已經放左40度左右嘅水(略高於體溫),冚埋鍋蓋,等麵包自行發酵一個半至兩個鐘,之後就可以見到麵團發漲了兩倍。

BreadPic3

然後就可以將麵團用拳頭將裡面空氣壓出來,再重新搓成團,再放鐵鍋中二次發酵一個鐘,就可以將麵團拿出來倒入吐司麵包模裡面了。要注意既係,油紙不是必須,但必須係麵包模塗一層油,否則焗完就唔可以完整攞出來了。

BreadPic4

好喇,開始要焗了,但就好似開頭講,其實冇焗爐,點算?當然又係用啱啱嘅鐵鍋啦,倒走啲水,開始開大火乾燒一分鐘(相等於平時焗爐嘅預熱),然後放蒸架入去,再放埋麵包模,記得一定要放正中,冚蓋轉最細火,焗30分鐘(估計鍋內溫度相當於焗爐係150-200℃左右),應該見到麵包已經正常膨脹,裂口了,其實就已經全熟,不過我不能確定每個人屋企嘅煤氣火力是否一樣,測試全熟嘅辦法,係用一支竹籤插入麵包,拔出冇麵粉粘連就係熟,如果未熟就再焗多一啲時間,每隔10分鐘睇一次。最後可以將整個麵包模倒轉180度,麵包個面向住鍋底再焗五分鐘,將表面都焗到金黃(最後哩步唔係必須,但個麵包會好睇好多),就完成了。

攞出來等溫度降低後就可以將麵包同個模分開,開頭有塗油嘅話,應該稍微倒兩下就整個麵包會跌出來,唔需要用任何刀去刮,然後就可以切開熱騰騰嘅麵包來食啦。

提一提,如果鍾意擺葡萄乾,杏仁之類嘅野,可以係第一次發酵後放入,然後係焗之前,係面上再鋪少少上去,其他步驟就一樣冇分別。

最後要講講,係必須選擇生鐵鍋,因為無論易潔鍋或者不銹鋼鍋,都不能承受長時間乾燒,會燒壞並釋放有害物質,我嘅認識範圍,只有生鐵鍋先可以(編按:除左生鐵鍋,仲有熟鐵鍋都可以乾燒,不過所有鐵鍋都唔可以有塗層,亦唔可以太薄身,會變形),哩個必須注意。依家好多焗野都可以係冇焗爐嘅情況下搞了,但最大嘅問題係鐵鍋只能做到下熱,不能做到焗爐上下都發熱嘅效果,而且溫度唔容易控制,我都係試驗了幾次先可以掌握好個烤焗時間。

歡迎到我的專頁作進一步討論及交流:

「檸檬小廚」專頁:https://www.facebook.com/the.lemon.s.kitchen

文、攝:Ning C

 

 

 

Facebook 留言

則留言