【TMHK開台賀文】TMHK公信在

10174924_696111537112241_6544021081474245051_n

港語學:無冕皇帝白影開山,可喜可賀;「何謂邪鬼何謂人,人鬼如何兩不分」嘅後雨傘時代,白影確然係一個有血有肉,頂天立地嘅報人。為咗真相,為咗公道,七十九日爾來,白影以身犯險,奔走金鐘、旺角、銅鑼灣;白影腳下前線之「前」,夏愨道上大台再「大」,亦形見渺小。旺角黑夜,喋血街頭,were you there when the sun refused to shine?白影,在。

有人以為,政治污穢;非黑即白,所以素人可信。藍、黃兩陣,遂投其所好,奇峰突出,冒起許多來歷不明嘅奇人異士,自稱「我只係一個普通市民」「我冇政治立場」「我冇政治背景」「我哋係中立嘅」「我哋係第三勢力」,取信於村民。白影則不然,笑罵由人;鑿住「熱狗」二字嘅血滴子飛來,處變不驚,不與泥漿摔角。有人坐足兩個月,沙龍照影得唯美,以「延續雨傘運動精神」作招徠,踏足政壇;有人走遍三個區,真理在胸筆在手,無暇炫耀身上戰疤,默默守護真相。平心而論,前者值唔值得選民一票,筆者未敢妄下定論;至於後者之公信力,港語學仝人敢以人格擔保。請君為我傾耳聽--聽TMHK。

本港有志之士相勗,常言「貴圈真亂」;無他,私怨大過天。願白影一半菲律賓血統、一枝鐵筆、一顆赤心,得以打破中國小農DNA五千年來宿命,澄清一潭濁水。善哉。

陳樂行 @港語學

林擇言 @港語學

黃浩鋒 @港語學

SamXjones @港語學

羅依 @港語學

圖片來源:港語學Facebook專頁