萬聖節唔想出街同人逼? 不如留喺屋企煮南瓜
萬聖節就到，與其出街出錢畀人嚇仲要同人逼，倒不如留喺屋企同小朋友或者屋企人雕下南瓜共聚天倫。南瓜除左可以整燈籠其實仲可以用黎煮餸，據說南瓜有豐富既果膠，可以幫助腸道吸收多餘既糖同脂肪，今日就同大家分享下南瓜炆排骨既整法。
材料好簡單，只需要一個細既南瓜、排骨、洋蔥同少少蒜蓉。
首先用鹽、糖、老抽、生抽、酒醃排骨，備用。
南瓜洗淨，用刀切走外皮，開半後用匙羹刮走南瓜籽，切片。
開火，預熱後落油，爆香洋蔥同蒜蓉。
落南瓜，略炒，逐少逐少加水。
落排骨，用南瓜蓋好。有剩既醃料倒埋落鑊，咪做大嘥鬼。
轉中火，煮大約十五至二十分鐘後試味，按個人口味加入適當調味，今次我用左豉油、雞粉同糖較味，不過其實蠔油都係一個唔錯既選擇。
落埋芡汁，禮成。
文、攝：Kelvin S.
#TMHK20151028
