定期排毒必備—黃豆芽炒甘筍

大時大節放煙花造成嘅污染，令整個維港附近都被有毒嘅煙霧籠罩，就算唔去觀摩，都受到影響。冬天又就到，空氣容易受到某北方經濟強國嘅工廠污染。

既然冇辦法阻止發射煙花同空氣污染，只可以自己排下毒，畢竟毛主席都講過：「身體係革命嘅本錢」。

材料：黃豆芽一斤（綠豆芽都可以），甘筍兩條，糖，鹽少許，米醋兩匙。

做法：黃豆芽洗淨去尾，如果唔鍾意個頭都可以去埋，不過會少左唔少營養，我並不推薦，另甘筍切絲備用。

倒半碗水下鍋煮滾，落鹽、糖及少少油，再放甘筍落去，轉中火冚蓋燜五分鐘。

然後再把黃豆芽全部放落去，落兩匙米醋，炒勻後再冚蓋燜兩分鐘後就完成了。

豆芽類蔬菜本身富含纖維，所以具有非常好嘅排毒功效，而落醋，原因之一係味道，另外一個就係能令豆芽更爽口，而鹽就不適宜加太多，會破壞本身嘅營養，能少就盡量少落。

歡迎到我的專頁作進一步討論及交流：「檸檬小廚」專頁

文、攝：Ning C

部份內容經編輯修改，原題為《煙花好污染，又要排毒了——黃豆芽炒甘筍》。

#TMHK20151106