唔放心，咪自己整囉——日式豬/牛肉飯

最近吉野家出聲明表示自己冇使用任何福島嘅食材，但又表示自己嘅米係來自中國黑龍江，哩個係要同金源米業最近特別強調金象米成份「絕無中國米」 來一分高下？對於有部分網友表示唔知以後仲去唔去吉野家食嘢表示迷惑，本人就有一個好建議，自己煮。

所以哩次就係介紹大家點整日式豬/牛肉飯。

主要材料：一包切片豚肉（約半磅，改用牛肉都一樣，或者兩者各一半都可以），洋蔥一隻，味噌少許，日本米一杯。

做法：豚肉解凍後，加一羹糖，兩匙生抽，兩蓋燒酒，一匙生粉，攪拌均勻醃製半小時。

洋蔥切絲備用，拿一個碗落少許味噌，20-30g，用少許滾水溶開備用。

開大火燒熱個鍋，落油並加入少許洋蔥。

炒到略微軟化就將豚肉同埋剩餘嘅洋蔥一起放落去轉中火炒，炒到肉片睇落去表面冇血，就落埋剛剛整好嘅味噌水，轉細火燜煮一分鐘後，就完成了。

牛肉飯配菜可以係四季豆，亦可以係生菜之類，圖中係水灼嘅四季豆。飯嘅方面，水有少少放多左，所以可見圖中嘅飯比較軟，不過對最近腸胃有啲唔舒服嘅本人來講就剛剛好了。