自製椒鹽豬扒條 / 菠蘿咕嚕肉 保證無地溝油

難得都會想食炸嘢，炸嘢麻煩，用好多油，而且唔健康，但就係好味，只能同自己講——「拉勻一生計，都唔係食好多遮」，而且係屋企自己整，最少可以控制啲油唔會係翻炸無數次嘅萬年地溝油。

主要材料：梅頭豬扒3塊
麵糊材料：低筋麵粉80g，泡打粉5g，雞蛋一隻，燒酒50ml。
咕嚕肉材料：罐頭菠蘿一罐，青椒紅椒各一個。

先將豬扒洗淨，然後切條，每條約1.5CM闊，然後用少量鹽、糖、及胡椒粉醃製約半小時。

等醃製嘅時間，可以切青椒，準備好菠蘿罐頭，開罐，菠蘿切塊。

醃製完成會發現豬肉出水（或者講係血），冇需要理會。

然後就要開始做麵糊，先打個蛋，倒入燒酒打勻，需要慢慢加入麵粉，不要令麵粉結塊，否則等陣炸完會食到麵粉塊，麵粉全部混合完成後，再加入泡打粉。

個麵糊完成後就直接同啲肉混合埋一起，然後充分攪拌。

然後可以開始炸豬扒條了，油溫不需要太高，幾多度唔知道，冇溫度計哩啲高科技產品，只係用經驗，滴一滴麵糊入個油鍋，會即刻浮係個油面，個溫度就夠了，一直保持就OK。

豬扒條不要一次過放太多，每次4-6條，否則油溫會忽高忽低，炸1分鐘左右就可以起了，先放埋一邊，因為仲要翻炸。

全部豬扒條都炸過一次後，就可以開大火，提高油溫至200度（其實都係估計，判斷方法係油未冒煙，冒煙就係過龍了，會產生大量有害物質），然後將豬扒條放入去炸第二次，哩次只需要炸15秒就夠了，正常就會炸到完全金黃。

將炸好嘅豬扒條上碟，碟上面可以放一張吸油嘅廚房紙，吸左啲油。然後拿一半分一個碟，撒上椒鹽，椒鹽豬扒條就完成了，之後再整菠蘿咕嚕肉了。

將切好嘅青椒紅椒入鍋炒兩下，落少少鹽，30ml茄汁，然後將菠蘿罐頭裡面嘅水一起倒落去，一起煮一分鐘左右，然後再用一羹生粉調一小碗芡汁，再倒入去。

之後可以將菠蘿，豬扒條，一起放落去，開大火翻炒，炒到個汁開始濃稠，就落兩匙羹米醋，再兜兩下，就完成了。

歡迎到我的專頁作進一步討論及交流：「檸檬小廚」專頁

文、攝：Ning C

部份內容經編輯修改，原題為《係屋企炸嘢，最少冇地溝油——椒鹽炸排條 \ 菠蘿咕嚕肉》。

#TMHK20151116