蔥油餅係我非常鍾意嘅一種小食，北角有間小店嘅蔥油餅好好食，但因為係「煎」嘅，所以油份比較高，如果用焗就可以相對減少用油，而且因為蔥油餅並唔需要非常高溫，所以用電飯煲嘅溫度已經足夠。
麵團材料：中筋麵粉450g，黃糖10g，鹽5g，酵母粉5g，水250ml，橄欖油40ml
蔥油材料：大蔥兩條，鹽10g。
第一步係製作蔥油餅嘅麵團，將上述麵團嘅材料放係一個鐵盤裡面混合埋一起，揉成一個唔黐手嘅麵團，跟住將鐵盤封好保鮮紙，再係鐵鍋中放好溫水再放個鐵盤落去，然後冚蓋等麵團自然發酵，溫水大約就係保持30-40度嘅溫度，因為哩個溫度係最適宜酵母菌生長嘅溫度。
發酵需要一至一個半小時，係哩個時候就可以來準備好蔥油餅裡面嘅蔥油餡料。我有選用大蔥，而唔係平時嘅青蔥，因為大蔥味道更加濃烈，特別係切嘅時候就可以感覺到，大蔥嘅刺激絕對唔會比洋蔥小，搞到我要戴好抗爭三大裝備之一嘅眼罩來切蔥。
另外切蔥，我有先將大蔥綠同白嘅地方分開，蔥綠就切好放一邊備用，蔥白就準備個平底鍋來將佢地用油煎到軟熟，將裡面嘅水分全部蒸發出去，然後就會發現，一大碗嘅蔥，變成只有半碗了。
煎好嘅蔥就拌入鹽試味，感覺略鹹就OK了，因為之後蔥油餅嘅味道就要靠哩啲調完味嘅蔥來帶出來。
一個半小時過後，麵團已經充分發酵，會發現麵團好似充過氣一樣，比之前大好多，而且表面都變得光滑，就好似一隻巨大嘅水煮蛋。
將麵團拿出來，壓出裡面嘅空氣，捏成一個長條，並切成四等份。依家就要開始將蔥包入到麵團裡面了，我嘅包法係先將麵團壓扁，變成一個餅皮，拿煎過嘅蔥白同埋冇煎過嘅蔥綠係個麵團中線附近堆一條陣出來，然後再將麵團卷起成為一個長條，將兩邊壓扁，以免蔥會跌出來，然後再將哩個長條向其中一頭盤起，好似條蛇咁樣，一個麵團就完成了。
重複四次就可以係上面撒上芝麻，然後將有芝麻嘅一面向住電飯煲鍋底放過去，因為要先煎有芝麻嘅果面（另外一面其實都可以撒芝麻，不過相對少），另外放落去之前記得係電飯煲鍋底掃上一層薄薄嘅油，以免黐底。放係個鍋裡面要再靜置三個字，等麵團再略微發酵變大，就可以準備打開開關了。
電飯煲正常開當煮飯一樣焗三十分鐘，然後關機，將個餅拿出來翻面（要小心熱），然後再焗三十分鐘，蔥油餅就完成了。
歡迎到我的專頁作進一步討論及交流：「檸檬小廚」專頁
文、攝：Ning C
部份內容經編輯修改，原題為《巧用電飯煲——焗蔥油餅》。
#TMHK20151126
