冬日必殺菜　私房羊腩煲

最近降溫，終於有進入冬天嘅感覺，而來到冬天，當然要食羊腩煲。

材料：羊腩一磅，山藥一條，粟米一條，洋蔥兩隻，紅酒250ml，青蔥一把，老薑少許，豆豉一大匙，南乳三塊。

做法：哩次我冇用個鐵鍋來煮了，因為需要「煲」，最好係用平底深鍋，而且最好係複底，因為複底傳熱比較均勻，開細火時唔會只有鍋中間一點受熱，導致中間溫度太高以致燶左。

首先落油爆香蔥段及老薑，因為煲既時間較長，薑唔好切薄片，大塊少少，等佢慢慢出味。

然後將洗乾淨嘅羊肉放落去稍微翻炒，見幾面都熟就可以落紅酒250ml煮到滾，跟住冚蓋轉細火燜煮一小時。（用唔同酒會有唔同香味，可以嘗試用其他酒）用酒來煲主要就係要整走羊嘅騷味，另外就係增加湯嘅甜味。

燜煮時可以去準備其他材料，特別係山藥。處理山藥我建議最好帶好手套來搞，因為山藥切開時候會流出粘液，會導致過敏，手會好痕（當然唔係所有人都會敏感）。去皮切條後就OK了，然後粟米都係，切成幾段，等羊肉燜煮一小時後再放入。

而羊腩煲調味就主要兩味嘢，就係豆豉同南乳，屋企豆豉醬用曬，否則直接用豆豉醬更方便，爾家就只可以用原粒豆豉自己加熱水攪成醬，然後再加南乳混合後再倒入鍋裡面，之後加水到淹沒曬全部材料就可以了。

又需要煮滾後轉細火，燜15分鐘，之後就可以將兩個洋蔥放埋落去，可以見到，已經變成滿滿嘅一鍋，繼續細火再煲15分鐘就完成了。（放洋蔥時候可以放埋支竹，豆卜等其他嘢落去，睇個人喜好）

歡迎到我的專頁作進一步討論及交流：「檸檬小廚」專頁

文、攝：Ning C

部份內容經編輯修改，原題為《冬天就係要食羊——山藥粟米羊腩煲》。

#TMHK20151226