有時間返工，冇時間煮餸—唯有蒸茄子

電視上嘅五分鐘，十分鐘教煮餸，好多時候，係冇計準備材料嘅時間，特別係有時候會見到佢地係節目之前就已經準備好曬一堆切好曬嘅材料出來，而且中途仲會特別提示你「為節省時間，我地將已經準備好嘅XXX拿出來」。所以，真係到我地自己去整，就需要更多時間。

瑞銀最近公佈《價格與收入》研究報告顯示香港僱員每年工作2,606小時，全球第一，所以基本上每日返九放六，一星期做夠六日，每日返到屋企，講真，叫你再用一個幾鐘時間來煮餸，真係一種折磨。但去外面食，價錢又貴，又可能好污糟，例如渠蓋切菜，鮑魚刷炒飯等等，只有估唔到，冇你食唔到。所以我只能折中下，係屋企整啲又簡單又好味嘅餸，時間約十分鐘。

材料：大茄子兩條（約一斤）、蒜頭兩粒、生抽、米醋、糖、麻油。

做法：

洗好兩條茄子，切片（推薦斜切，厚度一厘米，每塊會睇落大啲），然後就擺鍋裡面大火蒸七分鐘。

係蒸嘅時候，就可以去處理個醬汁。兩顆蒜頭剝皮，然後壓扁待用。攞一個碗，一匙羹糖，四匙羹生抽，四匙羹米醋，一匙羹麻油，再將兩粒剛剛處理好嘅蒜頭放入攪勻直到糖全部融化，個醬汁就OK了。

等茄子蒸好，攞出來淋上醬汁，就大功告成了。可能會有人問，啱啱啲醬汁夠嗎？好似好少，但其實因為蒸完嘅茄子本身就會出水，淋上去佢地好快會同啲水混合埋一齊。

平時要做簡單嘅餸，其實最簡單就係蒸嘢了，而其中蒸茄子算係最簡單，因為只要沖洗乾淨就得，又唔需要去皮。另外如果鍾意蒜嘅味道，可以將蒜頭切碎後放入再混入醬汁，味道會更出，自己選擇啦。

歡迎到我的專頁作進一步討論及交流：

「檸檬小廚」專頁：https://www.facebook.com/the.lemon.s.kitchen

文、攝：Ning C

#TMHK20150924